كلمات الشاعرة

  فاطمة علام

زهرة الصبار  …

  عمري اللي عشته  

من بدايتي لحد ما قلمي كتب

شايفاكي رغم الهم 

أم

مش أي أم 

فيكي الحنان ليه ناس وناس

وف طبعها زي القطط 

مكارة وبتاكل ولادها المطحونين

وتحب خناقها وبس

بتمد ليه الخطوة حتى لو بعيد

 بتجري عليه بلهفتها

وتضحك له برقتها

وترقص له 

وتفرش روحها ع الرملة

وتدلق كل أشواقها على اقدامه

دي عامية القلب من يومها 

وعاملة بينا ١٠٠ حاجز 

 و١٠٠ ريختر 

ما بين حضن النبي حارسها 

وبين قلبي اللي بات سهران

 على بابها بيحرسها

تقولش أنا ابن ضرتها؟

 وحق الله

 دى واخده روحي بالقوة 

يا شيخه التقوى فين راحت

 وامتى تطلي بصباحك 

دا انا وقلبي فرشنا الشوق 

على بابك

وعطرنا الأماني بذوق 

ف محرابك

تعالي وقربي يمي

 وهاتي القلة وامليها حنان يمي

 وهاتي الضلة وارخيها بحنان امي

يا كاملة الحسن والأوصاف 

دا فين العدل والانصاف 

دا انا آخر طريق للشوف

شوفيني مرة بعيونك

أنا العاشق

 ومتكحل بأحلامك سواد جفني 

وعيني لم تدوق النوم

يا ويل القلب من ظلمك 

لا شفتك مرة زرتيني

 ولا بليتي يوم ريقي

ولا طيبتي يوم جرحي

 ولا شوفتك فى يوم فرحي

ولا قلتي في يوم مالك 

ومالي في الأساس مالك  

عزيزة وسايقة فى دلالك 

وليلي فى الغياب حالك 

 غريب أمرك 

عجيب أمري 

 برغم القسوة فى عيونك 

بغيب وارجع

 وبتمنى الاقي حضنك الدافي 

 وبدعي ينعدل حالك

يا إما بكفيانا عذاب 

هشوف غيرك تداوي دمعتي ف عيني

وتفرح لو تلاقيني 

في أحضانها

تقرب قلبها يمي 

ومن غير لوم يا فايتاني

هاقول هي بقت أمي

كلمات الشاعرة

  فاطمة علام

أبلة فاطمة