يا بنتي حالي كده …

كلمات الشاعر

الزجال سرور

يا بنتي حالي كده من وأنتي في اللفة

لكني حامد وشاكر والبسمة ع الشفة

ما هو أنتي بنت حلال طمرت ربيتي فيكي

ما أنتي اللي زييكي تاج راسهم العفة

كبرتي قدام عيوني وانا بشقي لجل العيش

دخلتي جامعه وأخوكي عسكري ف الجيش

ما شفت منك غضاضه ف شغلي ومسيرتي

ولايوم خجلتي من أبوكي عامل الورنيش

بتجيني من غير كسوف قدام عيون الناس

وأحس حركة شفايفك بتقول دا ابويا ياناس

ولا يوم نسيتي غدايا والا دوا السكر

ما هو أنتي سكر حياتي وقمري الوناس

سترني رب البشر من فضله وانا محني

رضيت بلقمة حلال وبيكوا فرحني

عرفت انا م الجزم طبع ومعادن ناس

منهم شبيه الماس وفي جزمة تجرحني

لكني عمري في يوم ما يأست ولا مليت

ولا يوم طمعت في شئ ولا أيدين مديت

رامي حمولى عليه يرحمني يوم العرض

ولا سبت يوم الفرض ونفسي أحج البيت

يا بنتي روحي اللهي ما تشوفي شر في يوم

وأشوف عيالك قصادي ولا يوم تشيلي هموم

وأن كان على انا ها اعيش لحد ما أموت

أجمع حصاد القوت ولو عشانكوا هاصوم

كلمات الشاعر

الزجال سرور