قلبى غير …

ـــــــــــــــــــ

 كلمات ✍🏻 

الشاعرة … يامنه اليمنى

صحيح الدنيا فرَّاقه 

والفرقة مرض ولعين

تعيش أرواحنا مشتاقه

باللوعة مع التايهين

وبعد سنين هنتقابل

وم القسوة

هنعمل روحنا مش شايفيين

ده حال الدنيا غدارة كما الشياطين

وغصب أرواحنا تتلاقى بكل أنين

تفيض الدمع من عينا 

وتنزف بحر دمع حزين

وآه على ضحكة مجبورة 

تعيش بالغش ياولداه

وآه من نظرة مقهوره

بتتمنى ليلاتى الموت وتترجاه

وآه من دنيا بتفرّق

وتسرق منا أحلىٰ حياة

عشان الدنيا دى ظالمه

تخاف النور

كنا بنحلم نبقى طيور

نتفرق ونتلاقى بكل الحب

ولا نقابل فى يوم الزيف 

وقصاد عينه اضحك له

ومن قلبى بدون تزييف

واللى يعيش ف الوهم كتير 

لكن قلبى زى الشجرة بيطرح خير

أما الدنيا دى حالها خطير

كبشت فرح العمر ف ايدها

وبعدت عنى كتير مسافات

زارعة ف قلبى الجرح جروح

خلت حزنى ما بينى وبينى

رافق عمرى وصعب ابوح

أما جميل الروح خلانى

أرجع تانى واعدى السور

مهما الدنيا دى هتفرقنا

من دعواتى

راح ازرع له سنابل نور

وأما أشوفه

كل ساحات العين راح تطرح

أجمل كحله ف عين الحور

وانا ظلمتنى الدنيا كتير

لكن قلبى زى البحر بيطرح خير

مهما تعاند وتفرقنا

راح تجمعنا الكلمة الحلوة

فى حلق ضمير

علشان قلبى طبعاً غير

عمره مايقسى ولا يوم ينسى قلب حبيبه 

على طول ذاكره بكل الخير

         كلمات ✍🏻 

الشاعرة … يامنه اليمنى