كلمات الشاعرة
حنان شاهين
صورة سيلفي
و ابتسامة كبيرة
فيها احساس بالأمل
خففي التجاعيد شوية
زودي اللمعة في عيونك
كتري ضي الفلاتر
كل شيء في الصورة
لازم يبقى أجمل
بصي طول الوقت فيها
خلي بالك من رنين الضحكة
و انت بترسميها
زودي الايكو شوية
و اكتبي ديما قصايد
فيها احساس بالتفاؤل
خلي سيرة الحب حاضرة
بفعل فاعل
حتى لو مجهول
و تقديره سراب
حطي باقة ورد أحمر
ويا خلفية موسيقى
فيها بهجة
و لا غنوة حب حلوة
صبحي على أصدقائك بابتسامة
خلي كل اللي يشوف صورتك
يقول انك سعيدة
صدقي كل الكلام الحلو اللي بيكتبوه
و اللي يبعت لك على الخاص اشكريه
و ابعتي له قلوب كتير
القلوب الحمرا دي
اللي بتطير في الهوا
جمعيها في كف ايديك
سمعيها نبض قلبك
و اطلقيها في شاشة زرقا
كل ما فيها افتراضي
عيدي نفس الحالة تاني
كل ليلة و كل يوم
عيشي فيها
أي كدبة بذرة صالحة للحياة
المهم تصدقيها
كلمات الشاعرة
حنان شاهين
Hanan Shahin
Discussion about this post