رصيد الأفراح . .. .

……………. 

كلمات الشاعرة 

هيومة حمزة

باكينام حمزه 

خلصت رصيدي من الأفراح

مش عاوزه لا تورته ولا دياولو

ولا قرض إن شالله بميت مليون

ما الدنيا في عيني سداح فى مداح

شايفاها أنا طول الوقت جراح

أنا بعزم روحي علي جر وحي

وباخدها وأنام ..

بشرب قهوتي أو شاى نعناع

لاجل الأيام

لاجل أما تمر ف شرايني

أنساها وأقول يمكن أرتاح

مين بس يقول إن أنا ممكن

بسهولة أبيع ناس شاريني ؟

وبتمن البيع أشتري تفاح..

وأسيبه يخمر..!!

واصُبه في أول كاس يتباس

مني وأشرب

ما أنا لازم م الواقع أهرب

وأغيب عن وعيي يادوب لساعات

وأرجع للواقع وألقاني

بسألني سؤال …

أشكال الناس ليه مختلفة ؟

مع إن ريحتهم متشابهه

وأزاي الرايح زي الجاي

وأزاي حيعدي عليا أصحاب

كان ليهم عندي رصيد مدفون

وما شفت ملامح تفاصيلهم ..

من ورا شباك قلبي المطعون

بسهام الغدر ..

للمرة الألف انا حساها روحي بتتشل

والشارع جوه الروح مقفول

وبأمر الدم المتسرسب جوه الشرايين

ومعلق يافطة ما حد يفوت

علشان ح يموت

وبخط عريض مكتوب ممنوع

وأنا واقفه هناك برصد ف دموع

ناس كانوا عايشين جوه الشرايين

وفى ناس نايمين

وفى ناس واقفين علي ناصيه عمري بقالها سنين

وفي ناس عايشين بره الأحاسيس

أنا قلت كتير منهم ( يا مغيث )

ليها ضحكه كلها كدب وغش

عايشين في الضلمة وبيخافوا

من شكل النور …

وأنا كل ملامحي معديه حاجز بلووور

ماشبهش لناس جرحت روحي

وتملي أكيد غاويين نوحي

مع أن القلب يساع ملايين

ولكنه حزين ..

على ناس .. مش ناس

نوياهم تشبه لون الطين

أخدوني هناك لمغيب الشمس ..

وفي عز الصبح

لطلوع روحي

ح يكو نوا شاهدين

كلمات الشاعرة

هيومة حمزة

باكينام حمزه