ليلى
شعر سعاد سعد
فوضي الوصال فوضي
القصة كت من هيش
قلبك دا متوضي
لازمه ولي ودرويش
هنقبل وهنبحر وهندادي
ونطوي ربوع وكام وادي
ندور يوم على فرحة
وحلم جميل يكون نادي
هواكي طيش وكله غيوم
ركبنا بساط على الفيوم
سواقي تنعي حظ قليل
يعوض رزقنا ويدوم
هلف وانول معاه دنيا
واغمض عيني ليه ثانيه
هواه نيلي وكله حنان
ما انا قبلت ع المنيا
وهبني لك في عش سعيد
بقلب حديد قصور الشوق
هغني واعيد فى وادي جديد
ويوم لقياك حبيبي هروق
هواك خدني لبحر احمر
وقلبي هواك وكان خالي
تجيب دبدوب وقلب احمر
حبيبي هدوب يا موج عالي
نخطي العتبة فى بني سويف
هوى مقبل نسيم ع الكيف
خطف رمشي كبير القوم
اخدني عزيز بحد السيف
بنات بحري مهاجرة افواج
يحط السرب جوا سوهاج
ومين يحسن ضيافتهم
حضنا النيل بدون امواج
هوى اسيوط غَزل وخيوط
دا غزل بنات من السكر
تقول بحري شبه مريوط
يا دوب قطفة أوام تسكر
وفوت الدنيا على الاقصر
وشمت هوايا بالحنة
أمد الخطوة ليه تقصر
جميلة بلدنا من الجنة
ولو قَبلت على أسوان
سمارة تمره من أفنان
حبيبي رق على حَالي
ودَق الرِق صحا كَمان
رماني الشط ع النوبة
حضنت السد كان عالي
يقولوا فوتيه اقول توبة
شبكني يا بوي طرف حالي
ولو تلاقيني فى حلايب
يضمك قلبي ده دايب
ويبقى الطرح على كيفنا
ونايبك م الغرام نايب
ولو تسبقني على شلاتين
أخبي الشوق فى ورق التين
يا عمري الحاضر الغايب
تضمك روح من العاشقين
يا ليلى خلاص لاقيتي عريس
دا بلدي يا بوي وواد جامد
ويا سعدك دا يشبه قيس
قايم فرضه شاكر حامد
من ديوان دمعة الحنية
Discussion about this post