عمري العزيز كليته…

عمري العزيز كليته.

بقلم … غزلان البوادي

عمري متاعب فى العذاب قضيته

ومامن امواجع غير ماعديته

منك ومن وقتي اللّي ضايمنى

وسرّي دفنته فى الكننين كميته

لكن زمانى لزني وروّمنى

والفرح ما جاني نهار وريته

سبعين بصمه عالنكد بصمنى

عمري تعدّى والهنى خلّيته

درتك حبيبي والغرام عدمني

غير ياعزيز افهمنى

ظلمنى بلاك الدهر لاتظلمنى

كان غير تفهم

انا ياعزيز تعبت

اجّرّعت مُر الحنظله تعذّبت

وماعاد نقبل عذر ليك ان جبت

وكانه حساب لخاطرى حاسبت

اترك سبيلى من غلاك ارحمنى

حرف المحبه الصادڨه شطّبت

من يوم ما حظّي عكس وهزمني

عفت المحبه وف الاعلان كتبت

وصرّحت حبك ما بڨى يلزمني

وندمت عل ماضي ، كرهته تُبت

المولى عطاني صبر بيه لهمني

غير ياعزيز افهمنى

ظلمنى بلاك الدهر لا تظلمني

غير ياعزيز ارتاح

اتركني بروحى بقهرتى نوّاح

عشير هم ، تنڨض كل يوم اجراح.

وحتى الزهر غضب ومخاصمني

انت تريدنى يابو العيون اسماح

نرجع لكار الذل وترَوّمْني

وانا شريفة اصل ما ننزاح.

ضميرى نصحني بعفتي علّمني….

ليلي ظلام وما وراه صباح

وكل ما طلبت سعادتي يرجمني

ضاعت حياتي العمر منّي راح

ليام ظلموا والزمن حطّمني

جيتك بربي ،ياعزيز افهمنى …..

ظلمنى بلاك الدهر لاتظلمنى….

كان غير تفهم

بقلم غزلان البوادي