،،،،،كنت،،،،،،

،،،،،كنت،،،،،،

…….
كلمات الشاعرعلي فاروق

كنت بأشوفك بين العالم حد كبير
كنت في عز أوجاع الكعب الدايب م المشاوير
كنت جناح بهدوء بيطير
يسرح بي في ملكوت وحديَّ
بالطبطبة كنت الحنية
كنت ملاذي في وقت عسير
كنت بأشوفك إنك غير
لكن خير
طرت بعيد وبنفس جناحك
دقت آلام هجرك وجراحك
من غير كلمة أو تفسير
لكن كل السالف ذكراً
بيخليني أقولك شكراً
كنت مخادع واخد درجة حد خبير
وأنا أصبحت أقوى بكتير
منك حقي ماهافوتش
اتعلمت الدرس خلاص
ما الضربة لو ماتموتش
بتقويني تزيدني حماس
وأنا بأعلنها قصاد الناس
كلمة حق صريحة وحرة
يمكن ضرة
فيها مسرة
ومرة في مرة
منها النفع يكون لي كتير
وبيكفيني
سجنك شلت جميع قضبانه
كل حيطانه بقت عالأرض
وإن كان ذلك فرضاً يعني
هوه مجرد فرض اسمعني
إنك نفسك
يرجع أمسك
إني أرجعلك تاني أسير
اصحى دا حلم مالوش تفسير
قول اللهم اجعله خير
…….
كلمات الشاعر
علي فاروق