كلمات الشاعرة …عفاف أحمد التركى
زي ما تدخل مشهد حب جرئ ع الشاشة ..
وتخرج من فاصل إعلان
زي ما تبكي لوحدك وحدك..
وفجأة يدق الباب علشان }. …{
زي حبيب مالقاش من كتر حلاوة قلبك ..
غير يتبلّي عليك قدّامهم ..
وانت فـ جزء بعيد تتناسي
…. وبتسترجع كل كلامكم ..
وتقلّب ع الشات مشاعركم ..
وتقول عادي اكمنه جباااان.
💢 تمااام بالظبط ..
زي الندهة اللي تصحّيك من أحلي منامة
وماحددددش موجود في البيت..
زي صدام ع الصبح في حد ..
بيفتح بينكوا كلام وحديت
وزي دخولك وانت في حالك بين اتنين..
وبتصلح بينهم ..
وخروجك بهموم الدنيا..
فـ تقول الحمد لله اتعشّييييييت
💢 تمام بالظبط
زي النكتة الخارجة في بالك لمّا بيحصل
مثلاً موقف ..
تلقي الضحك ..
بيخرج شابط كل حروف الخخخخخـ.. وإشاراته
زي حالاتك لمّا بتبقي قصاد شحّات ..
وانت معكش الا يا دووووب حق مواصلات ..
بـ سكات بـ تروّح.. تجلد ذاتك من نظراته
زي الجون الجايبُه في روحك ..
من حوارات محتاجة شهامة ..
وهُمّا لِمامة ..فالواحد بيعيد حساباته
💢 تمام بالظبط…
زي عينيك ما بتلقط صورة تاريخها قديم ..
احساسها قديم ..
وتحس كأنك فيلم قديم..
وكلمة End بتنزل تنهي القصة .بطولها
زي الحلم ..الي بترميه في بحر الواقع
ما بيتبلّش..
جملة صبر وما بتتحلّش..
او وصفة لعطّار وعشمنا ..
نشربها وتظهر مفعولها
زي خانات بنسدّد فيها ..
ونشطب فيها ونكتب فيها ..بأحمر جاف ..
تواريخ عشّاق استنزاف …
و١٠٠٠ شعور جواك استُشهِد ..
لمّا دخلت اللعبة مراعي كل اصولها..
💢 تمام بالظبط..
زي الخبط في سقف دماغك م التفكير..
حبّة شوف كنت محوّشهم ..
كام دمعة الارسال نغبشهم ..
سر وحد حكي لي عليه
زي السَلَبَة اللي بتحدفها لفحت كلامهم..
زي الحضن امّا تريّحهم وبتفهمهم
فبتحصد وجعك منك فيه
زي الناس اللي بتتحوّل زي الزومبي
..فيتهيألك أي خلاف هيمّصوا في دمّك ..
فتطلع تجري لـ برّا النَص…
وشايل علي كتفك معانيه
💢 تماااااااام بالظبط
زي نسيم الحب ان عدّي ولطشك لطشة
..خدت الدور ورقدت سنين
وانت مكلفت فيك احزانك علي اوزانك ..
نَزّ حنانك ..نيّم حلمك نِنّه وطار
زي المفضوح.. بجواب انذار ..
و راكب يأسه بالمندار ..
فـ اتهد جدار السَتر عليه..
وفـ غمضة عين اتشد ستار
زيّك ..وانت ممرمغ خطاويك بدموعك
..من شارع الازهر للعتبة لميدان رمسيس
..وبتلغي حاجاا ت جوّاك
مش فاكر بدأت امتي وليه ..
فـ يفرمل تاكس قصادك فجأة..
يُكررر شتااااايم ..
فـ بتضحك له وانت مدمّع ..
يادوب بتجمّع..
حرفين تايهين لأجل الراكية ..
اللي انت بتحرق فيها قديمك كلّه..
نارها توهوج .. جوّاك أشعار.
…. ……… ……. …… ……. …..
تمااااااااااااام …بالظبط
كلمات الشاعرة
عفاف أحمد التركى
Discussion about this post