*من اليوم*

الشاعرة … منى البابوري

من اليوم
يا الي تركتو
في قلب الي عشقكم
ليعة

اش يفرق معاه
من بعد هجركم
توديعه

و آش همه
تسافروا من غيره
و تهون عشرته
و يشد مكانه غيره

غير القوا حبيب خلافه
و ما تحيروا
و يا سعدكم كان لقيتوا
ريش حنين
و جناحات يطيرو

كي مشيتو متتلفتوش لتالي
و لا تندموا نهار
و تجوا تسألوا
على احوالي

ال ما حليت في عينه
ما عاد يوم يحلالي
و ال ما سعد بوجودي
لا تسعد بيه ايام و لا ليالي

من اليوم باش نحب روحي
و نعشقها
و نحطها تاج فوق راس
كان الي عشقها
و لا نرضى حد يزود في همي
و لا حد فرحتي من وسط قلبي
يسرقها