الشاعر محمود يحيى يكتب انا مسرف جدا ف مشاعري

أنا مُسرف جدا ف مشاعري

وإحساس الخوف

عايش بين ناس .. مالهاش أحلام

وكإني بعيش بينهم مخطوف

يمكن تعرفني أما تشوفني

ويبان على قلبي علامه كبيره لألف سؤال

يمكن أصعب على قلبك مره ف برد الشوق

من بعد ما غيّر أحلامي من حال ل حال

وتهز ضلوعي عشان أصحى

تلقاني بدندن أوجاعي على شكل حروف

أنا مش ملهوف

والدنيا ماهيش فارقه معايا ..

ودّعت ف ناس كانوا أغلى الناس

كانوا مرايه

ويوماتي بخبي ف درج الليل

آخر تذكره للموت والنور

أوقات معذور .. وكتير هربان

بتسابق عمداً ومصمم

يحضني القطر اللي واجهته

من بعد وداعها وأحزانها

ف نفس القضبان ..

واسمع ضحكتها مابين الريح

-أنا مش سَرّيح-

أنا كُشك كبير مليان حكايات جوه الكراتين

أنا أول طعم لغزل بنات من قبل سنين

وفيونكه بترسم ضفايرها

على مدد الشوف

أنا ناظر أكبر دكانه

جواها دموع واقفالي صفوف

كلمات الشاعر

محمود يحيى