ازااااي….. ❗

كلمات الشاعرة
هيومة حمزة
——————-
إزاي قدرتي تصبري بالشكل ده ، وبتبدري علي سكتك شمس إبتسامتك ،
وإنتي اللي شايلة جوه قلبك كوم مواجع
والكل شايف حزن متداري في وسامتك..
كل الحواري الضيقة في قلبك براح
ومشاعرك المهمومة ، عاكسه
نور وضي …
إزاي قدرتي تلوني طعم الجراح …
وتغني برضو غنوتك ..
وبنبض حي …

ازااااي….. ❗
قدرتي تكتمي… ظلم المشاعر
مرتين …
ورموش عنيك أتحولوا
ساحات حنين…
حتي الرضا في قلبك نغم
عازفاه علي وترك حزين

إزاي …. ❗
إزاي قدرتي تدفني قهر السنين
و تروضي كف القدر
مين لبسك خيش الفراق
واتلبسك سهد وسهر
ونسجتي منه توب حرير … !!

ازااااي….. ❗
قدرتي تلملمي كل المواجع في الضلوع
و كمان قدرتي ع الرهان في مزاد كبير
دفن العذاب كانلك شقا
لا القلب ناح حد البكا و لا
حس عمره عذاب ضمير
يا ضمير وماشي بين دهاليز مهجتك
رغم العذاب مرشوش علي دروب
سكتك؟
نسجتي من وجع السنين أسطوره فالناس حبتك..
مين علمك تتحولي من قلب تاه … .
لحياة اعادت للفرح مليون حياة

ازااااي….. ❗
إزاي قدرتي تسخري حبل الخناق
لطوق يكون على ضفتك هو النجاة
رغم إن قلبك في الهوى شاف العسير
لكنه حول كبوتك بسمة شفاه ..

أزاااي….. ❗