مرفق طيه
مرفق طيه..
قلبي اللي مفيش زيه ..
وآخر دمعه من عيني
ونظره من صميم روحي
وتوقيعي ..وحشني هواك.))
صوته العشق
……………
كان الصباح الحلو يجي ويبتسم
شايل رساله معطره
بأحلى الكلام،،
ويمر صوته العشق .. ويبث الغرام..
والضحك يملأ الكون مابينا و يغلف الدنيا الهيام..
أجمل ماشافت عينه انا هو اللي قال.!
وأميره القلب العصي..وأسطورة الشوق والغرام ،
نفرد جناح الشوق سوا
ونطير بكل الأمنيات ويا الهوا…
تلمح عيونا ضباب كتير
فارش سمانا وعمرنا ،،
وتعاند الدنيا المرام
ياهل تري آن الاوان !؟
حسيت بقلبي بيندبح ..
والجرح بينقط هوان ،
حتي العتاب م القسوة زاد
شقق القلب لخانات
خانة الدموع لما اتملت فاضت عليها الذكريات ..
خانة الحنين شبعت سكات ،
وخانات كتير موشومه بالويل والآهات
لميت حياتي وذكرياتي
و الكلام ويا الملام
والعشره ويا الأشتياق ..
ومعاهم .. (وحشتيني )
وسافرت ولأول لقا
لقيت هناك نظرة عنيك
ولمحت شوق لمسة ايديك
ولهفة قلب كان يوم حى !!
ومعاها أجمل أمنيات
كان نفسي أزرع الأمل
وأبدر بذور الحب ومعاها
الوفاء ،،
لكن لقيت الأرض بور
طرحت عناد…
رجعت وبقلبي اللي حي
لكنه في الحقيقة مات .
كلمات الشاعرة
باكينام حمزة
