عشق الشعر
كتبت الشعر ع الهادي
كلام موزون
كلام نابع من الشريان
كلام يتحط على جرحى
فيوم يصبح
كأنه ماكان
كتبت حروفى بدموعى
سقيتها الشهد من دمى
فكل حروفى راح تطرح
شجر ألوان
وشهد اللقا دايما ما فيه نسيان
هتقرى الكلمة راح تشبع
دفا وحنان
وتتغطى بقصايد عشق
وتستمتع بموالى مع الألحان
وتتفرج على الدنيا بكل أوان
مابين السطر والتانى
هتلاقى هناك بستان
بتطرح فيه جناين عشق
وبتزهر
النادر من الأغصان
كتبت الشعر وهكمل
ولو مصلوبه ع الصلبان
هطلع كل أحزاني من الوجدان
وهرسم شط البحر ومش هغرق
دا أنا عاشق ملوك الجان
راح أكتب قصة وردية
بتحكى عن عروس البحر
وعن أمير طاير على الفرسان
بيسابق هواه ويحلم بالروقان
أنا عاشق حروف الشعر
ولسه قلبى راح يهواها
بكل مكان
بكل لغات العالم
من أفريقيا لباكستان
وحتى لو هموت هكتب
يارب إنت المدد ليا
تنصفنى
وترحمنى من النسيان
كلمات الشاعرة
عزة السعدنى
