كلمات الشاعر 

فارس ابو تريكه

عروستى …

بحبك بس مش عارف اعبر ع اللي جوايا

كما الايه اللي محفوظة و اخاف ارتلها و اتلجلج قصاد الناس

بخاف جدا من الكلمة لو اتقالت تعفر ع القليب الماس

و اخاف اكتر ابص ف عينك الصافيه اروح ف النوم

و اخاف اكتر يمدد نني تحت رموشك الضله

و اخاف م الحب و العله 

و اخاف ضعفي يبان قدامك اتعري و ابان عيل

بيتشعبط في نهدينك و يعمل منها خداديه و يستهبل و يتميل و ينسي ف روحه جواكي

يا حلوة انا قلبي يهواكي و عايش بس ل هواكي و بضحك من شفا دواكي و ترياقك

بحبك بس مش عارف اقول انا لسه مشتاقك و مشتاق الغرام فيكي 

و احبك رغم ثقتك فيا و الغيرة 

و احبك مهما قولتي عليا واد سكري و انا مبحبش الخمرا و لا دوقتش ف يوم بيرة

و لا كان ليا اي مزاج غير حضنك و حضنك احلي تعميرة

و لا الكييف عمره كان صاحب و لا الافيون بيغويني

مفيش غيرك هَنا عيني

و حبة شعر بكتبهم مع حالي

بقول الحق ياكش يحسنا الوالي

و اقول الصدق لو علي الرقبه 100 سياف

و اقول لأا مانيش قايل و لو بتابعي اخباري 

تلاقي الناس تقولك طبعه مش بيخاف 

لاكن عندك بيقلب بطه مسكوفى و يعملك 200 خاطر

و يعمل لو زعلتي حساب

بعيد عنك غشيم في القول و في الالقاء 

لكن عندك بيبقي من الايمان اواب

و بيحاول 

يِكَفر عن غيابه ساعات 

و بيناول

من كف السما نجمه و من كف البحور مركب

و بيحاول

يجيب م الارض وردايه و يعمل م الهوا موكب

و تتزفي

حبيبتى الشعر ما يكفي و لا يوفي و لا عارف اقولك إيه

و لا عارف انا اثبتلك

ب ان القلب و الجته خلاص ملكك و لا ينفع معاكي شريك

فا يعني لو تكرمتوا يا خلق الله

توصلوا ليها احساسي عشان و الله في وجودها

مانيش شاعر

و لا بعرف اوصل حبي ليها كلام

 كلمات الشاعر 

فارس ابو تريكه