برغم البعد
وكنت بقول أجيب للقلب دقه منين يحب الحب من تاني .
يرجع لي الشباب وجموحه من تاني .
يرجع لي أغاني حليم
وفيروز اللي سحراني .
لقيت القلب سابقني
يقول العمر مش بسنين
ولا بترجّعه من رحلة التوهان
أماني حلوه وأغاني
وإن شبابَك اللي راح
بيرجع لك .
ويبدأ ويا أول نبضة من قلبك
بترعش للي قالك عود
وانا جنبك.
أنا الخطوه اللي يبدأ عندها عمرك.
بإيدي همسح الدمعه اللي نازله تسيل على خدك .
وايدي الثانيه راح تمسح
على شعرك.
وهندهلك
اقول لك عيش حياه تانيه
وما تفكرش في اللي راح
ده بعد الليل تنور دنيتك ثاني
بأحلى صباح
وتمحي نسمته الصافيه آلام
وجراح .
حبيبي :
إفتكر إني برغم المحنه ،
تلقاني
ما انا عشت الحياهْ صابرهٰ
ولا سلمت يوم نفسي لأحزاني .
ولا الدنيا برغم اللي قاسيت فيها
عن الأفراح وحب حبايبي منعاني .
وليه أحزن
مادام في القلب إيماني وأذكاري وقرآني .
وربي عمره ما نساني .
أقوم الصبح وادعي له ،
فيفتح لي بيبان الخير .
أحس اني حمام بيطير .
و ارفرف في السما وحدي .
جناحي يلمس النجمهْ
تنور لي.
برغم الضلمه والعتمهْ.
حبيبي إفتكر دايما
بإن الحب مش كلمهْ.
دا نبضة قلب بتقولك :
انا جنبك .
بتوحشني وانا جنبك .
ورغم البعد والمسافاتْ .
ورغم ان اشتياقي ليك مهوش كلمة
هقولك قلبي بيحبك .
وهكتبلك بنبض القلب خبيني …
في قلبك دوم وخليني..
أنام فوق ريش نعيم قربك…
كده على طول .
واوعى ف. يوم تصحيني.
كلمات الشاعر
د. جمال مرسي
