غرام مدبوح

بتيجي ليه علي بالي

مش إحنا خلاص ، !

بِعدنا وقولنا ياللا فُراق ..

ساعات ب أشتاق

وقلبي باشُوفه مِتشعبط

في حَبل الوِد والأشواق ..

يَجوز قلبَك يكون زيي

علي جِذع الحَنين مقتول  ،،

يَجوز واحشَاك ، لكن ساكِت

ومش عايز تِبوح وتقول ..

غروب العِشق مش ساهِل ،،

وعمر الذكريات ماتموت ،،

مانيش ناسيه عِنيك لما

قالت لي هناك

باحبِك موت ..

قرار البُعد كان قاسي ، وصعب كإنُه

حَرب وجيش ،،

نهينا في اللي كان بينا ،

وفركشنا في لحظة طيش ..

فُراقنا كان علي غَفلة ، وشَد ستاير الحِرمان..

قِبلنا ليه نكون قصة  ومنسيه في ليل احزان

حاجات ياما بتتسرسِب وتيجي تملي

علي بالي ،،

حاجات دائماً بتضعفني ،

وتِربك موقفي الحالي ،،

تِحرك ذِكرى جُوايا ، وتُقصد  تستفز الروح ،،

بتيجي ليه وأنا حَرفي

بينزفني غرام مدبوح ..

ياطير مجروح علي بابي

كفايه أيام عتاب وخصام

تعالي إبدأ ، وأنا هاقبل ،

وهاعلن حبي ليك عـ العام ..

كلمات الشاعرة

هيومة حمزة

بقلم الشاعرة

باكينام حمزه