ما كنتش نعرف على مُوجك
كونو صعيب حتى علا مُوجك
لو تقُلِّي شنُو الِّي جَعلا مُوجك
يهيج و يتنكَّر لأعزّ لحباااااب
**************************؟
يا قلبي لا تِبكي و لا تبقى حزين
إنسَى و سَامَح و السّماح زين
و إذا كانو خفاف كون انت الرّزين
نعديو لبعضنا و ديما نِبقُو أصحاااااب
**************************؟
على قَد ما الحَيَا عَلْ كَرامة ساومِتنا
و على قَد ما الظُّروف عَل مُر لزّمتنا
قبلنا و شربنا كاسها و ما متنا
غلبناها و حلِّينا جميع لبوااااب
**************************؟
لو نعرف دوا الصّبر يِتباع وِين
راني و لّيت من كبار المُداوين
لا عمرنا غدرنا حد و لا نا وين
علاش الغدرة تجينا كان مِل قراااااب
**************************؟
قَدّاش باش تستوي و تجيب اللِّيقة
و قدّاش باش تغطِّى من تفليقة
المركّب ماهوش كيف الِّي مخلوق خليقة
خاف من ربي و من يوم الحسااااب
***************************؟
الشاعر التونسي الحبيب المبروك الزيطاري
