التجاوز إلى المحتوى
كلمات
الشاعر .. احمد قدري
فيس وبوك والف لوك
ناس بتجرى وناس تزك
واللى من قلبك تضيفه
بكرة يعملك بلوك
فيس وزحمة وناس كتير
حواديت ولك ومكلمة
تشكيلة خيش على حرير
وخداع وكدب بمعلمة
صبر وتباتة وخيال مأتة
فى الهدوم عمال يلق
فيس وخلق واكل عيش
حكايات وضحك على الدقون
مواضيع كتير مابتنتهيش
وحاجات توصل للجنون
حملان ديابة عايشين فى غابة
على الغلابة دايما تسك
فيس وصورة جنب صورة
والبراده شئى اساسى
جمهور ولعب وناس وكورة
والكهين عمال يواسى
والحلنجى والخبيث واللى بيفلق يفك
فيس وبوك وافاقين
واسامى تايهة فى بعضها
تماثيل وناس متحنطين
عايشين حياه مش ادها
حواديت وزمر واخره تيت
وخناق وزيطة وناس تعك
فيس وغش وناس ترش
بخور وملح ومستكة
وناس تخش بالف وش
غاوية الكلام والتريقة
ومين وفين وازاى وليه
مليون سؤال ونو واوك
فيس وريش على مفيش
وزهر عاشق للآلام
حصان مالوش صرع وعريش
طايح وفالت م اللجام
ده يرمى لوم وده يرمى جرح
وده فى الكلام عمال يحك
فيس وعالم من كلام
وشوش بتضحك فى العيون
حسبة صعبة مين وكام
مافهاش قلوب تعرف تصون
حسبة شرقى وحسبة غربى
حسبة فالس وحسبة روك
=====
كلمات
الشاعر .. احمد قدري
