سقف بيتنا كان سما …
كلمات الشاعرة
حنان شاهين
سقف بيتنا كان سما
و القمر قنديل وحيد
لما يظهر
تطرح الحواديت
علي عتب البيوت
تفرش مصاطبنا ونس
لمة جيراننا الطيبين
و الفضفضة ساعة المسا
بترش في الشارع ندى
نلعب و نجرى و نستخبى
نضحك فتحضنا الشوارع
تسبقنا روحنا بخطوتين
يوصل غنانا للسما
كانت سمانا قريبة
كانت شوارعنا حنونة
و طيبة
تشبه وشوش الأمهات
تشبه لطيبة جدتي
و هي بتوزع دفا
من حضنها لكل العيال
تشبه حنان أمي
و هي بتطبطب علي
كتف الزمان القاسي
لجل يلين لنا
و تصد حر الشمس
عن روحنا
بكفها المرفوع
لرب العرش دايما بالندا
الستر من عندك يارب
الستر كان هدمه و غطا
الستر كان نظرة رضا
رايحة جاية
بين عيون أمي و أبويا
و كلمة حلوة
بتصالح الليل عالنهار
و تبدل الغيم بالصفا
سقف بيتنا
كان بيسمح للمطر ينزل علينا
و كأننا زرع الملايكة الطيبين
راضيين و مرضيين
و لا برد كان
يحوش الدفء عن روحنا
و لا حر كان بيهمنا
الكون صديق طيب لنا الشمس بتفتح يوماتي
عشان يزهر قطننا
نغزل غطانا و فرشنا
ضل الشجر بيحنن الشمس
في بؤونة عالبشر
برج الحمام مرسال محبة للسما للبرتقان لون الفرح
و لدهب قمح الغيطان
يوم الحصاد
رنة بتسعد قلبنا
ولخبيز الفرن ريحة
نشمها نشبع و نحمد ربنا
الوشوش رغم الشقا مبتسمة
و التحية طيبة
في المسا …
( سالنور يا خالة )
خالة زي الأم أم
لكل طفل في كل دار
سقفنا مسنود بجارنا
و كل جار مسنود بجار
جارنا كان يشبه أبويا
كلنا نشبه لبعض
في البساطة و الخضار
الستر من عندك يارب
الدعا سهل و بسيط
العبادة فاس في ايد
سبحة من حبات عرق
فلاح في غيط
يتوضى من نور النهار
و يقوم يوحد ربنا
كلمات الشاعرة
حنان شاهين
Hanan Shahin
