بقلم الشاعرة … منى البابوري
قداش عندي ما رقدت مليح
و قداش عندي نحسب في حساباتي
و لا حساب منهم طلع مرة صحيح
قداش عندي نلم في ورق الخريف
و ناسية الي ما شدت في العرف
لازمها يوم باش اطيح
قداش يعدي من عمرنا خسارة
و قداش تعرفنا على ناس للخير نكارة
و تنسى حتى كي تعمل معاها مليح
قداش حكينا حكاياتنا لعباد عرفناهم
لقينا الحديث عند ناس ما عشنا معاهم
يالندرا الحديث بجوانحه يطير
و لا هم ما كتموه و في لحظه منهم
هزه الريح
قداش نشكي من ناس ما صانتنا
و قداش نحكي على ناس بالغلط جابت سيرتنا
لكن عزاز ديما عالية و غالية همتنا
و لو حتى كثروا علينا بالتجريح
وقت و يتعدي و كل شيء يبقى دروس
مهما توجعنا لازم باش تهدى النفوس
و كل حد ما قدرنا نمحوه م القاموس
عزاز نفس ما نطيقوا ناس في القفى سكين
و في الوجه تعنق و تبوس
بقلم الشاعرة … منى البابوري
