الكينغ يكتب….(أنطولوجيا الشّتائم القيروانيّة المُهذّبة للمُبتدئين / بالعاميّة):

الكينغ يكتب….(أنطولوجيا الشّتائم القيروانيّة المُهذّبة للمُبتدئين / بالعاميّة):

ثمّة يا سيّدى شيباني إسمو عمّك رحومة، بلاغجى، يصنع بلغات الجلد. ويسكن في حومة الشّرفة، تى في سرّة البلاد، في قلب القيروان القديمة..شيّوبة فذلاك ويحبّ الكلام الموزون، الكلام الصّندى، متاع ناس بكرى، وهوّ فات الثمانين، روّح يلقى زوجته أمّك عيشوشه تبكى وهي تتابع مسلسل حريم السّلطان، عاد حبّ يفذلك معاها، قالها: (يا مرا….باش نتزوج عليك مثل السلطان سليم في الحلقة السابقة !!!…)….تنهدت ومخطت وجاوبتو بكل برود و هي تتابع الحلقة السّادسة و التسعين من مسلسل حريم السلطان وتبكي بالدموع على قهرة وغصة (بيرجار خانم) جاريّة السّلطانة هيام العجوز قائلة:
– ريح السّدّ يهزّ ما يردّ وانشاالله تختارها منشار، مسنون شطّار. ولسان مسمار مرشوقلك غصّة فى الدّار ليل ونهار ، ودخلتها عليك بالحكاك والهرش الفتّاك وتجيبلك الطّحية والرّحيه والقاضيّة والماضيّة، تهز ما ترد وتقوم ما تقد، تنهض لك بالكبيب تخرجلك بالرديب وترجعك بالنديب، ان شاء الله بالساحق و الماحق و الغضب المتلاحق تدخللها بالضيق وتطلع منها بالضيق وستة وستين ابريق، ما يبللولك ريق، وكل ما تغمض تفيق، على الصياح والتفليق والصدان والتغليق..ان شاء الله تصاحب الفيران من قلة الجيران و ترقد في الخربة من قلة القربة ويراك كي الكانون النقبة في جنبك والنار في قلبك، يراك كيف الفكرون لا تنبت شعر و لا تحك ظهر ولا ترجع خبر ولا تكمل سفر. يراك كي الورل، مصهود بالقايله والرقبه مايلة والرّيقه سايله ويجعل مكتوبك على وعَر، الجلدة لايثه والحلق مُرّ . الله يجعل صباحك جري اللّهوث وليلك هرش البرغوث يرّاك كي ولد مالوش، الدّار مبيوعة و مافيبالوش….يرّاك كي ولاد الغُزّي، لا يقلّك زيد، لا يقلّك يزّي….يرّاك كي ولاد الوهايبي، الفقير شاعر والغني حلايبي….يرّاك كي ولد فيّالة، الوجه مخطوف والكرش سبّالة…يرّاك كي ولاد العلاّني، العين زرق والدّماغ فزّاني…يرّاك كي جماعة ماجر، الصغير نمس والكبير فاجر….يراك كي ولاد ميلاد، الصباح نوم والليل سهاد….يرّاك كي ولاد شرف الدّين، الفلوس بالرزم وغارقين في الدّين…يرّاك كي اولاد الجيّد، العسكري هارب والبطال مقيّد….يرّاك كي ولاد بالحولة، السّقيفة واسعة والبيوت فولة… يراك كي ولاد الهدّاجي، الخال زبراط والعمّ يلاجي …يرّاك كي ديار الوحيشي، العتبة عاليّة، السّقف جحيشي….يرّاك كي ورثة ولاد الورتاني، الأرض لفلتان والدّار لفلتاني…يرّاك كي ولاد بوجداريّة، عولتهم محمّصة وقدّيدهم عقاب لِيّهْ… يرّاك كي ولاد العيّادي، لاتعرفهم هنا، لا تعرفهم غادي…يرّاك كي أولاد الفجّي…تقلوا صباح الخير، يقلّك الله ينجّي…يرّاك كي ولاد هرّوم، يفيق للعشاء ويرجع للنّوم….يرّاك كي ولاد الوسلاتي، ما تسمع منهم كان هاتْ وهاتِي، يرّاك كي ولاد كميشة، قماشهم زاهي ووجوهم خيشهْ…يرّاك كي ولاد البعزاوي، الفطور في باجة والعشاء نفزاوي…يرّاك كي ولاد المُقدادي، الحال كوفي، والخطّ بغدادي…يرّاك كي ولاد العوّاني، السّخانة في الجلدة والبرد جوّاني….يرّاك كي ولاد العناطر، العيون زايغه، والخشوم تتقاطر….يرّاك كي ولاد السّلاّوي، كلّ ما تسلّكها، تزيد عليك البلاوي…و خليني ساكتة، ومن غير تفذليك ماسط بربّى يا سي رحومة، توّ هذا وقت تفذليك والحلقة قريب توفى؟؟!!، منحبش ندعي عليك بالشر، وموش لاهية بيك تووه أصلا، خلّينى في همّى أحسن ما نطّرشق عليك ونفشّ غيظى فيك…

د.(كمال العيّادي الكينغ) المستشلر الثقافي الاول لصحيغة الرواد نيوز المصرية