كلمات الشاعر …الناصر صلاح الدين
قافل على نفسك
١٠٠ ضلفة إزاز …
… مكشوف جواك .. باين شفاف
أربع أركان فى مربع حواليك برواز …
… من جوا ومن بره
كلك متشاف … !!
… من كل سطورك وكلامك ..
حتى أما بترسم وتلون أحلامك …
… حتى أما بتبكى ع الورقه آلامك
حفظوك …
… عارفينك عاشق
من عَصر العشق اللى الناس نسيوه …
… عارفينك أغلب من عنتر
… عارفينك تلميذ الصبر
فى محراب أيوب …
… على فرعك الأخضر
عصفور الشعر بيتمخطر …
… مش عارف من الدمع تتوب
وبيطلع من قلبك نور …
… من قمر العشق اللى الخلق شافوه ..
… فى عيونك نظرات اللهفة
بتخطى وبتعدى السور …
… مين زيك عاشق للنجمة
بيتونس بيها …
… مع إنك ساكن ع الارض
مين زيك بيلم النسمه …
… … ويهديها …
… وحاضنها من حر وبرد
أحلامك فى الدنيا شباب …
… وامانى مسافره زوادها الشوق
بتعد الأيام بالثانيه …
… وعزيمه معافره
بتكسر فى حيطان الطوق …
… بِتفَتَح فى الصخر الباب
للأمل السهران فى ليالى الحب …
… وانت الموال والناى
ودموع القلب …
… وانت اللى جبينك عرقان
بيطفى النار …
… وبيضحك على ليل الحزن
وبترسم للشمس نهار …
… يتجلى على خدودها
وتسَمِى على ست الحسن …
… مين زيك ؟؟ !!
حساباته ماتعرفش الوقت …
… الليل فى قاموسك تسبيح القرب
وقصايد بتكسر جدران الصمت …
.. جَمَال فى العشق عنيد
بتحدى المشاوير الصعب …
.. مين زيك يتحمل أوجاع الغربه
ورزالة الخلق …
… مين زيك صابر فى الوحدة
محروم من نسمة عشق …
… أيام بتعِد سنين
والعام بيخيم ع العام الجاى …
… شايل فى حمولك ومكمل
وأما بتتمنى الفرحة . بيبكيها الناى …
… وعيونك بتعَيِد على قلبك وبتسأل
هانعيش إزاى …
.. .. روحك مشتاقه ..
… مطروده من الرحمه
إحساسها عفيف …
… ولا عملت ذنب …
الدنيا شيفانى ضعيف …
… على روحى بتقفل
بروايز الغلب .. .. ..
Discussion about this post