جلطة 3D …
بقلم : سلمى صوفاناتي
( نفتتح المشهد على دكان العم عبدو بتاع الفراخ . ماسك بإيده السكين بتاعته . بيحاول ينضفها بالمريلة . تحت ضوء لمبة صفرا . تدخل الدكان السيدة ري ري مرات رستم باشا بتاع الحكومة . داخلة عليه زي القضا المستعجل )
ري ري : ( بصوت عال ) مساء الخير ياعبدو .
عبدو : يا أهلاً وسهلاً ياست هانم . والله لو كنت عارف أنك حتشرفينا بنفسك ، كنت فرشت الدكان ورد و …
ري ري : قصره . أنا جبت معايا الميزان الإلكتروني بتاعي . اللي جبته السنة اللي فاتت من كارفور .
عبدو : ليه كده ياست الكل . هو إحنا يعني ..
ري ري : ( مقاطعة ) أنا عاوزة كيلو من رقبة الفراخ دي عشان أعمل عليها فته .
عبدو : تحت أمرك ياهانم .
ري ري : ( تفحص الفراخ )
لا لا .. أنا عاوزة رقبة فراخ بس مش زي أي رقبة .
عاوزها كلها مليانة غضاريف زي اللي بعتها النهاردة للست شوشو الخياطة . إديني زيها بالظبط …
عبدو ( بارتباك ) :
كل الرقاب فيها غضاريف ياست هانم ! دي أساسيات الفراخ !
ري ري : ( تضع يدها على خصرها ) .
إنت فاكرني جاية ألعب ؟
أنا عارفة إنكو بتاخدوا الغضاريف وتخلوها ل ” الفي أي بي ” قولي بصراحة : إنت شايفني ست ” أولاين أوردر ” ؟!
( أحد الزبائن يختنق من الضحك ، بينما العم عبدو يحاول أن يشرح )
عبدو الجزار : ( بتوتر )
والله ياست هانم أنا بريء هاتي رقبتك هاخليها تبقى أحسن من رقبة شوشو الخياطة .
( يبدأ بتفصيل رقاب الفراخ ببطء ، بينما ” ري ري ” تراقب كل قطعة وكأنها تخضعها لأشعة إكس “
ري ري : ( تصرخ فجأة )
آه دي شوية جلدة زايدة عاوز تحطهالي عشان تلعب بالوزن . وحياة أمي لخلي جوزي الأومباشي … يجبلك فرقة من حماية المستهلك .!
عبدو : لا والله ياست هانم .دي حتة حلوة .. بالعافية !
( بعد ٢٠ دقيقة من التفصيل والمراجعة ، والتدقيق والتمحيص ، ينجح العم عبدو في تعبئة الكيلو رقبة ، بعد طول معاناة . لكن الست ري ري ترفض أن يغلق الكيس قبل أن تزنها بنفسها . على ميزانها الإلكتروني )
ري ري : ٩٩٩ جرام . ياراجل يامفتري . اللي ماتخافش ربنا ! رحت بالجرام الناقص فين ؟!
( يتفرق الزبائن من الهلع ، بينما يضع العم عبدو إيده على صدره )
عبدو ( بصوت مبحوح )
ياست .. دي هبة مني ليكي .. خديها وكلمي الناس !
ري ري ( تغمغم وهي تضع الكيس في حقيبتها ) :
المرة الجاية هاجي وهجيب معاي الميزان الديجتال بتاع الصيدلية !
( ينهار العم عبدو على الأرض وينادي بصوت ضعيف ) :
ياجماعة .. جيبولي أسبرين .. أنا جتلي جلطة 3D ) الحقوني .
ري ري : ( بتعاطف ) الله يشفيك ياحج . بس متنساش المرة الجاية تجبلي كبده طازة زي اللي بعتها مبارح لخالتي أم علي .
( تغلق الستارة على صوت صراخ العم عبدو الجزار وهم بيسحبوه للمستشفى ، بينما تخرج ري ري هانم وهي تتفقد الشنطة بتاعتها بإبتسامة منتصرة ) .
والله لو مشيتو لعند جزار تاني حيقولك دي مش ري ري دي توسونامي .
