ديسمبر 16, 2024التصوير الضوئيمش عاجبني اللعب فركش … الرئيسية رواد الفن التصوير الضوئي مش عاجبني اللعب فركش … كلمات الشاعرة حنان شاهين مش عاجبني اللعب فركش عايزة إلعب لعبة تانية لعبة خارجة عن قانون الضرب في الحلبة المميتة و الصراع الحتمي فيها عشان أعيش لعبة حلوة ما تنتهيش لعبة أبقى فيها روح و لو ضروري يكون لي جسم يبقى جسم خفيف عليا جسم خارج عن قانون الجاذبية جسم هارب من قانون الوقت خايف م التروس كل ترس يفوت بيطحن حاجة فيا حد يحدف طوبة يكسر عقرب الساعة الغبية عايزة أعمي عينيها و أهرب منها مرة حد يرمي ستارة سودا ع المجرة عايزة افتح عيني أشوفني طلعت بره من يمد ايديه لقلبي بورقة بيضا عايزة أرسم لوحة تانية لوحة فيها الضل دافي و الإضاءة تكون خفية لوحة فيها الروح فراشة لما يدبل عطر وردة يستمر في وردة تانية لوحة أبقى فيها نقطة في الفراغ اللي حابة يكون نهائي روحي تعبت م المسافات البعيدة و السؤالات العنيدة و الإجابات البليدة و الأبد و السرمدية كلها استعصت عليا روحي تعبت م البدايات البريئة و النهايات الغبية من يمد ايديه لقلبي بورقة تانية عايزة أعيد شكل الحكاية مش ضروري فيها حبكة و خير و شر مش ضروري تكون في حلبة المصارع اللي فايز فيها مصروع في النهاية مش ضروري أن السيناريو الحتمي فيها ينحصر بين ميلاد و صراع و موت مش ضروري الناس تموت مش ضروري للحكم صفارة يرهب بها روحي و لو ضروري نبدل الصفارة دي بصوت كمنجة أو فلوت فركش المرة دي بس و بكرة نلعب لعبة تانية في الحقيقة هي هي نفسها اللعبة القديمة تبتدي بشموع و فرح و تنتهي بدموع هزيمة كلمات الشاعرة حنان شاهين Hanan Shahin المقالة السابقة ميت بس عامل نفسي حي ... المقالة التالية ذاكرة الوجع ...
