ياااعَم حُزن …

كلمات الشاعرة 

 منى عبد الرحمن

ياااعَم حُزن …

بِيك اكتَفِيت

مَالقِيتش يُوم زيَّك فِ بيت

خِل ووَفي

خايف حياتُه تِنْطِفي

ياخُد بقلب الروح مَعاه

يوْصَل لأعلىٰ مُنتهاه

وانا ماسكة فيك مِستَسلِمَة

خَطوَة بِخطوَة بِتناديني

مْسَلِّمَة

ولاقادرَة اقول لَّك إبعِد انتَ

ورُوح بِعيد

ولاقادرَة أصبُر عَ الُّلقا

وعُمري الشَّرِيد

وانتَ مِتَبِّت فِ الوَريد

عايش سَعيد

مَبسوط بنُوري الِّلي انقَطَع

فرحان بيَأسي الِّلي رَجَع

مش قادِر انتَ عَ الفُراق

وشايِفني بارحَل 

حَبَّة حَبَّة مِ الحياة

والعُمر تاه

وانتَ الِّلي ساكِن جُوَّه عُمري

وسِكِّتي

هَجَرِتْنِي كل الأُمنيات

غَادرِتني حتىٰ فَرحتي

وانا عايشَة بِيك مِسْتَسلِمة

ومْسَلِّمَة لَك.. كل حَرف

وكل كلمة فِ الأمَل

إيه العمل..ياعم حُزن؟

ابعِد شوَيَّة ابُوس إيدِيك

إبعِد عنِيك

يكفَاني مِنَّك كل دَه

إحذِف طريقَك من حياتي

احذِف كمان حرف النِّدا

مش قادرَة اقول بيك اكتَفِيت

سِيب عَندي بِيت

يمكِن أعيش

يِتصالِح العُمر الِّلي جايّ

يعزِف فَرَح علىٰ غُصن نايّ

ياااااعم حُزن

إبعِد بعِيد

إبعِد بَقَه

   كلمات الشاعرة 

 منى عبد الرحمن