واحد ديوان الليلة سادة
و صلحه
أنا قلبي لسه من سنين
في الدايرة واقف مطرحه
إيه يا قلم
ياللا قوام
ياللا زمان الشعر فايض جوا روحي
مستني على باب القصيدة
أي كلمة تريحه
ياللا وحشاني القصايد
ياللا واحشني زمان الفضفضة و البوح
إيه يا قلم
مفيش دوا في الأجزخانة لقلب شاعر في الحياة مجروح
مفيش دوا لجرح المشاعر
و انكسار الروح
إيه يا قلم
إكتب بقا
ما بقتش حمل الإنتظار و اللألئة
أكتب و قول
هو إحنا نملك إيه يا صاحبي
إلا ارتكاب القول
دا ساعات بتبقى الكلمة سيف مسلول
و ساعات بتبقى الكلمة قاتل
و السكات مقتول
و ساعات بتبقى طوق نجاة
و ساعات بتبقى في عز موت الروح حياة
إكتب و قول
عايزة الليلة دي كلام عجب
و أنا أوعدك
هابيع سريري و أبيع دولابي
و أشتري لك توب دهب
قول يا قلم
لو حتى كان قولك غضب
لو حتى كان قلة أدب
ثور و انفجر
الليلة ممكن تختلف
الليلة لا تهتم بالقافية و لا الأوزان
الليلة ممكن تعترف بالانهزام
قدام قوانين الخليل
الليلة ممكن يتعوج سِنك
و تحود بالكلام
مش عشت طول عمرك عدل
ماشي فى سطورك بانتظام
مش عشت طول عمرك
فى دور المستقيم
جرب تعيش فى المنحنى
يمكن تلاقي هناك – أنا –
باعمل عروسة
أنفخ لى فيها روح قصيدة ملهمة
يمكن ساعتها تدب فيها الروح
فاكر يا صاحبي لما كانوا بيظبطونا متعاصين بالطين فاكر زمان لما بكيت
من لسعة الكف الخشن
على خدي لما جريت
خبيت عروستي
في طاقة كات في الحيط
معرفش ليه
أنا كنت غاوية أعمل عرايس طين
مش عارفة ليه
كل أما أنفخ فيها كانت تنكسر مش إحنا برضه مخلوقين من طين
قول يا قلم
واسكن في روحي لحد يوم الدين
دا إنت اللي ما بين الخلايق خلق وحدك
وانت اللي فيك السر
ما بين كاف ونون
قول يا قلم
خليك حنون
إبعثني من طين البداية
حوا عاشقة للغواية
الليلة خدني وادي عبقر
نرتكب حبة خطايا
نعترض على فعل أمر
نستخف بحرف علة
نستفز الساكن المهزوم
في روحنا من زمان
قول يا قلم ٱن الأوان
إكتب تعاويذك هنا
إجمع شياطينك هنا
إفتح لي طاقة في السما وابني لي صرح
واعرج بقلبي لحد سدرة منتهاك
لعلي أبلغ مأمني وياك
لعلي أتحول بسحرك
من بشر
من أي حاجة بينكسر
و ابقى ملاك
قول يا قلم
الليلة فض الإشتباك
بيني وبين هذا الخرس
الوقت قام دق الجرس والشعر نادى للصلاة
و أنا قاب قوس
أو أقل من الحياة
هيا اقترب مني و قول
الليلة نجمك مش مهيأ للقفول
الليلة مارس سحرك الأزرق في روحي المؤمنة إنك رسول
إني هنا واقفة على باب الرجا أبغي الوصول
إفتح لي باب القصيدة
إفتح لي باب الدخول
كلمات الشاعرة
حنان شاهين
Hanan Shahin
Discussion about this post