لحظة لقىٰ …

كلمات الشاعرة 

فاطمة علام

( لحظة لقىٰ )

  نقطة لقىٰ بين القلوب اللي انتشت 

من غير ندم ولا لقلقة

لما العيون شبعت نظر

والدمع م الفرحة انفطر 

لما النجوم لمعت قوي 

علشان ظهور بنت السما 

كانت ليالي 

أحلا من شهد الحياة 

لا فيها حزن 

ولا شقىٰ

لحظة لقىٰ

الحب عمره ماكان خطيئة 

الحب دستور ربنا

لحظة ما حسينا بوجوده 

رجعنا تاني لأصلنا

والفكر حرر سكته 

وحلّق بعيد 

والجلد قشعر من حنان

حضن الأمان 

والنبض من نور الإيمان 

عاش من جديد 

مابقاش عنيد 

وقلوبنا غنت للربيع 

والتلج ساح 

والشمس ضحكت بالأمل 

إدتنا تاني وشها

كانت جميلة بسمة العشق البرئ

مع صحك تصريح بالوجود بين الوجود 

وازاي فى لحظة بينكسر 

كل الجمال…

 وازاي بقىٰ الممكن

 محال…

يا أغلىٰ من ضي العيون 

ازاي بقىٰ الإحساس يهون 

وازاي نضيع

يا كل من حرّم على قلوبنا المباح

يا كل من شاف الليالي مضلمة

ملهاش صباح 

وحياة ابوك إبعد بقىٰ

وسيبوني عايشة فى البراح

خلوني سارحة فى الخيال 

درويش ومجذوب الهوا طوافه فيه لأبعد مدىٰ وبغوص بروحي ف السما

يمكن يصادفني الأمل

 لحظة لقىٰ

كلمات الشاعرة 

فاطمة علام

أبلة فاطمة