من ديوان قلب نوح

(كابوس)

أنا شُفت الزرع المتدعبل
العود المحـني المتكــّـبل
والأمل الماشي..بيتكعبل
خطاويه بتضيق

والطيـــــر الفاقــد لأمــانه
متكتف بخيوط حرمانه
بجناحه يرفرف ف مكانه
زي…. البطريق

و سحابة غبيّــة و قــلّابة
و رياحها عتيّــة و غلّابة
السيل بيبهدل في غـَلَابة
والطقس خنيق

ولا صاحب ولا حد عارفني
أمواج بتاخدني و تحدفني
وماحَدِّش عالبر. شايفنــي
والبحر غريق

وشعاع الشمس المتخـفّي
ولا نوٌر ولا حتى يدفّـــي
والبرق الجاني…المتشفّي
والرعد ..عتيق

أنا شفت الخوف المتحوّش
بيزيد الظلـــــم…وبيـــلوّش
طمعان بيــلم وبيــكــــوّش
والجاني طليق

وأذان الفــجر ..اللـي اتأخّر
و أمان الـــروح اللي اتبخّر
الشـــط رمــــاله بتتصــخّر
بقى لونه غميق

و آيـادي تحـــزّم همتــها
ونفــوس بتلمـلم لقمتــها
عشمــانة بصحبــة ولمتــها
ولقلب صديق

و عيون بتفتح على بكـرة
بتشدّ الفكرة مع الذكـرى
و قلوب بتحب.. ومابتكره
محتاجة طريق

كلمات الشاعر
ايمن خليل