صوت المنادي مش واصل وداني
وصوتك إنـتي لحــــــن وهداني
وهاداني منك دعوتين ع الريق
بينجوا قلـبي لو لقيـته غريق
ويفكوا ضيق الحاله لو ضاقت
وصبري مادد م الأماني خيطان
ضحك الحيطان الشايله بروازك
فيها المـلامـح تحكي إنجـــازك
وإن جاز لحلمي يشتهي الضمه
ضميني ضمه تملى روحي خضار
أنا روحي بعدك دب فيها بوار
من يوم فراقك لف عقلي ودار
والدار ياحمده بتندهك تسابيح
عارفاكي حامده وطلتك تفاريح
رافعه الأيادي والدعا تواشيح
والـريح تعـدي عليكي وتهادي
ورد لعيوني ف صبحك النادي
وانده بإسـمك ربـنا الهـــــادي
ويسيل ودادي زي صوت الناي
وادور بشـــــعري للـوفا غـناي
واعبـي عطـرك للزمـان الجـاي
قساي زماني لما سيبتي إيديه
عرقك ياستي ع الجسور بالاقيه
لسه الكنب ف المندره باتازييه
واناديه دلالك لحـن ع الاوتار
أمشير بيعيد الذكرى والأفـكار
نوة حـنانك تطـــــرح النــوار
والنار بتحضن لهفــتي وتبات
جعانه روحي بتشتهي اللذات
مشتاق لطيفك ياجميلة الذات
وانتي الآيات النايمه جوا كتاب
أول دروس العشق ف الكتاب
الضبه شاهده وقعدتك ع الباب
يام العـتاب الأحلى م التفاح
لو روحي هايجه تلمحك ترتاح
طهرك ياحمده نفحه م الفتاح
مفتاح بيفتح كل باب مقفول
دليل وماشي ع السكك معدول
شعاع بيهـدي القلب م التـوهه
قالوا علـيكي حمـده مندوهه
فارده الخطاوي ع السكك لله
مالهاش ف دور المنظره والجاه
شافوكي ضله بتطـرد الأوهـام
ولقوكي حكمه تفسـر الأحــلام
وكلام جنابك يشــــبع الجايع
حـوجـة الوجـايع للطبيب ذله
إيدك بترقي وتشــفي م العــله
وانتي البسيطه وضحكتك ضله
القله جنـبك للعطـاشى سبيل
كان فعل إيدك ياحبيبتي نبيل
الـورد ســارق منـك التســبيل
والليل معاكي يدور كأنه أمـير
طاهره النـوايا والمشـاعـر أبهـه
زاينه الحـواري الأمـاكن كلــها
والطيبين وقت الوصول للمنتهى
بيطــــــــــــــــــــيروا طــــــــير
بيروحــــــــــــوا جـــــــنة ربـنا
ويسيـــــــــــبوا خـــــــــــــــــير
بيروحــــــــــــوا جـــــــنة ربـنا
ويسيـــــــــــبوا خـــــــــــــــــير
………………………………………
كلمات
معوض حلمي شاعر عامية
Discussion about this post