عقابك انسحابك

كتبت الدكتورة ندى محمد السيد

خلي ديما عقااابك هو انسحابك اكبر عقاب ممكن تعاقبه لشخص مقدرش قيمه وجودك في حياته واستغلها أو كسرك ووجعك كصديق أو كحبيب أو في شغله كشخص شاطر و مخلص

هو انك تمشي وتسيبه وتنسحب تماما تماما احرمه من نعمه وجودك وخلي ضميرك مستريح مش عشان الدنيا مفيهاش غيرك لاء الدنيا فيها كتير و ناس أحسن و أشطر و أوفي بس مش صادقين زييك

احرمه من الضحكه اللي كان بيضحكها معاك بجد احرمه من وقفتك جنبه وقت الشدة احرمه من جدعنتك معاه و اخلاصك رغم ضعف المقابل احرمه من الكتف اللي كان بيتسند عليه وقت ضعفه احرمه من احساس الراحه اللي كان بيحسه لما بيفضفض معاك او احساس الامان انه سايب ف ضهره اللي هيشيل كأنه شغله بالظبط

سيبه يروح يتعرف علي ناس تانيه وسيبه يفرح بالبدايات معاهم لان البدايات دايما أجمل كل مايعرف ناس أكتر في حياته ويتعمق معاهم او يجرب يشتغل مع غيرك كل ما هايعرف قيمتك اكتر خليه يتفرج علي صحاب المصلحه والناس اللي لابسه وشوش

امشي وسيبله الذكريات وهي كفيله تعرفه قيمتك .. والايام هاتلف وهايدرك انه خسر حاجه غاليه قوي مش شرط انه ييجي يعترف لك انه مفتقد وجودك في حياته او في شغله او ف اي علاقه بس كفايه هاتسيبه وعنده احساس بينه وبين نفسه انه خسر حاجه كبيره في حياته مش سهل تتعوض

خلي عقابك للي يزعلك حرمانه من متعه وجودك جنبه و ربنا يوفق كل الناس احنا لابننسي اللي وقفوا جنبنا في حزننا و تعبنا قبل فرحنا و نجاحنا ولا بننسي الي وقفوا قدامنا و حاربونا و هما ضهرنا و امانا ولا بننسحب الا لما بنعمل اللي علينا.