أنا والعصفور …

كلمات الشاعر 

عبد الرحيم على

أنا والعصفور …

_________

ولِسّه الفجر بيروّح

نقر عصفور بشبّاكى

لقيت الدنيا بتمطّر

وحتى الديك ما بيكاكى

ورد بصوته متقطّع

بكيت..إيه اللى بكاكى

دانا م البرد باتألم

وسبحانه اللى دفّاكى

ورفرف هز جناحاته

وجانى فى حضنى بيأفأف

مسح فى القلب دمعاته

وخلى القلب بيرفرف

سألت يا قلبى فين أمك

نزل دمعه على خدودى

وقالى يتيم ومين يرحم

علَىّ الدنيا بتصفصف

ده امى قلبها اتشقق

لحد الفجر حارسانى

تداوى جرحها بإيدها

وإيدها التانية شايلانى

وإيد الدنيا مشلولة

وقلب الكل بيعانى

أنا عصفور ومين يدرى

بأن الدنيا جارحانى

يادوب الشمس بتشقشق

بطرف جناحه غطّانى

ورفرف فى السما وقالى

يا اجمل حضن دفّانى

صحيح الحضن بيدفى

لكن يلزم له حرية

ولو كان العشم فىّ

براح الدنيا عنوانى

كلمات الشاعر 

عبد الرحيم على

Abdelrahimaly