كلمات الشاعرة 

منى عبد الرحمن

وَحِيدَة …

أخْبارِك ايه؟

مُش عارفَة لِيه.. 

عَايْشَة وَحِيدَة ف وِسط عَالَم كّلُّه شَر

مَحبُوسَة بِين جُدران كَئِيبَة بتِشْتِكي

أفْكار كِتيرَة بتِتْبِكي

أحلام فِ عِز نْهارهَا ماتِت عَ الْمَمَر

حَاسَّة وَحِيدَة وقَلبي بِيْسَلِّم نِمَر

والعُمر بِيْطَلَّع لِسانُه تْبان سِنانُه يقُولِّلي بَاي

وَقْتِك خِلِص مَسافِتْها كان فِنْجان لِشَاي

شِربُه الأمَل وَقَت امَّا كان العُمر جَاي

دِلْوَقْت قَطر العُمر بِيْبَلَّغ فَرار

مَفِيش قَرار

ولَا فِيه حَياة

مِشْوَارِي تَاه

ما بِين بُكا وعيَاط وآاه

ورُوح ضَعِيفَة دمُوعها نار

خَدِت القَرار

وجُوَّه جُدرانْها الكَئِيبة بتِتْحِبِس

تِسمَع شَكاوِي الزَّعلانِين 

والشَّمْتانِين 

والحَيْرانِين

وكُل شَكْوَىٰ تجُر شَكْوَىٰ وَراها تَار

وانا مِين بِيِسمَع شَكْوِتي

يِقْرَا الِّلي مَكْتُوب فِ العُيُون

ومِين بِياخُد بالإدِين التَعبانِين 

ومِين يِصُون 

كُل المَشاعِر والمَعاني اتْبَخَّرِت

كُل الهُموم اهِي جَات بسُرعَة اتْمَخْطَرِت

وَقفِت تِشاغِل رُوحي مِن تَحت الجُفُون 

وانا وَحِيدَة وِسط عَالَم كُلُّه شَر

  كلمات الشاعرة 

منى عبد الرحمن