ها يـيجى اليوم

ماكـنتى بتحْبلى راحه

وكـنتى بتولدى بالجوز

وألاقى اللقمه مرتاحه

أكلها لمّا كنت باعوز

وتوصل خٍلفتك مٍيّه

وأشوفك لسّه بـِكـْريّه

دلالك يحلى فى عنيّه

ينسّينى إنىّ كنت عجوز

,,,,,

طعام الدنيا من  زادك

وبالك ع الدوام رايق

وعينى تبصْ فى ولادك

ماتلمح حدْ متـْضايق

أعبىّ القـُله من نيلك

وأنا فرحان باغنيلك

ويحلالى سهر ليلك

وأنا لابس ومتعايق

,,,,,

ونـتـْـقوّت بعيش قافر

وضحكتنا اللىّ كات صافيه

لا دمع الفرْح بيعافر

ولا يـبوس الرموش عافيه

وأنا كاتب ومش ناسى

سنين الخير فى كرّاسى

وصورة كلمتى وفاسى

و شقوق رجلى اللى كات حافية

,,,,,

وقولت أصبر حاييجى اليوم

وألاقى الطفل بيسمىّ

على صرخه فى عزّ النوم

تقول لٍك إصحى يا أمىّ

وبأتعكـٍّز على الأسباب

ألاقى الصوت طلع ندّاب

أتارى الحَمْل كان كدّاب

وناقل عدْوى من دمىّ

,,,,,

حا أشيل اللفــٍّه للزفــٍّه

وشمع الفرْح والحنــٍّه

وأخلىٍّ البرْد يتدفــٍّه

على نار الغرام بينــّا

وأفك السحْر والأشرار

وأبخــّرلك حيطان الدّار

لمولود ييجى م الأبرار

معاه الحل م الجنـّة

كلمات الشاعر

سعد الشرقاوى