رخصة حلم
بكيت… وبسرعة جريت
روحت على القسم .. واشتكيت
قالوا … ها نحقق
فتحوا محضر … ففضفت وحكيت
سألونى … ضد مين
ضد حلمى
اللى انتهى قبل ما يطلع النهار
سابنى ومشى
من غير ما أعرف له نهاية أو قرار
كان معايا … جوه حضنى
كنا لسه .. فى بداية المشوار
تفتكروا عايش
ولا زييى .. قرر الانتحار
يمكن زهق من طول الانتظار
كان صديقى
مش مجرد حلم والسلام
عشرة سنين
عايش معايا ليل نهار
وكنت فى وجوده
حاسس .. بحلاوة طعم المرار
بسرعة
وصل الخبر للحكمدار
قال هاتوه
وسألنى
بتقول حلمك .. قضى معاك الليل والنهار
كان معاك … كان فى حضنك
دى محاولة احتيال
ممنوع على الحلم .. يوصل الليل بالنهار
دى محاولة احتيال
وانت متهم … بدل حلمكم بالاحتيال
حلمك عهدة
وانتى ماضى بالاستلام
يا تجيب حلمك
يا تبقى .. قضية اختلاس
ولا حلمك
اتعرض لمحاولة اغتيال
وعندى شاهد
شافك مع حلمك .. فى بداية النهار
وكان مصير حلمك بعدها .. الاغتيال
ولا انت عايز تبدله .. بحلم تانى
قبل ما يعدى النهار
سين سؤال
كنت بتحلم بره حلمك … ولا كان خيال ؟
وإن حلمت
معاك تصريح بالأحلام
وورقة بوسطة ودمغة
وإفادة ورخصة .. من البلدية والأشغال
ولا حلمك مخالف
كان فى السر والكتمان
هات بسرعة
ناولنى الرخصة فى الحال
وإلا .. تبقى بتحلم
فى يوم الحلم فيه محال
*
كلمات الشاعر
المهندس / إسماعيل منصور
Discussion about this post