ستاير الليل
________
ولسه الحزن متدارى
ورا الشبابيك
وياما القلب بيدارى
حنينى اليك
وحزنى عليك داى متدارى
ومش بيبان
وابات اسهر وفنجانى
مع الدخان
أنا العايش على الذكرى
بقالى سنين
ومستنى آمل يكره
بقالى زمان
أنا البردان لكلمة حب
دفيانه
تدفى قلب عاش يحلم
دفى وحنان
أنا ع البعد مستنى
ولا بيديش
يجوز يقابلنى بالصدفه
فى يوم عنوان
أفتش فيه عن الكلمة اللى
تفرش بالفرح فدان
بنشوة حب لو غابت
يموت القلب م الكتمان
فرشت القلب كام فدان
بكا وحنين
ونسمة م الهوا النعسان
وغيط ياسمين
تفوت ع القلب وتسلم
ورا الشبابيك
ألاقى الفرحة تتكلم
تاخدنى اليك
يا ناسي القلب وناسينى
وناسي هواك
مسير الفرحة ح تجينى
من الشباك
تهز الفرحة م النشوة
ستاير الليل
وننسي البعد والاسوة
بصبح جميل
كلمات الشاعر
عبد الرحيم على
Abdelrahimaly
Discussion about this post