بقلم الشاعره … ناديه عبد المحسن

يحضني ترياقك …

هيجي اليوم 

ونرفع راية العزه 

ونرسم ع السما غزه 

ف حضن ولادها منصوره  

وسنيوره بتتعايق على الضفه 

ومالكه الدفه بيمينها

عرايس القدس زافينها 

على جبينها الأمل مرسوم

ومتسطر

وحلم الشمس يبقى أخضر 

وكان لسه بيغزل توب 

لفجر سنين بيستنى 

على شعاع الأمل مادنه 

تنادي بدمعه للأقصى

هيجي يوم واخد تاري

واغني وازف أشعاري

يعود داري واعود 

تحضني اشواقك وترياقك 

أنا يوسف 

وقلبي يحن يشتاقك

وانا دائك من الأوجاع 

وانا عيسى ف وسط سباع

وانا الحاضره ف قلب الخوف

وانا الدره اللي مات ملهوف 

وانا علمك وقرآنك

وريحة الأسرى في أدانك

هيجي نهار ويفتحلك

شعاع النصر أبوابه

وبشرى الهادي تبعتلك

كام فرحه ف معراجه

يا طعم المر والسكر

وحلم العمر ومتبت

هيجي الليل واكون شمعه 

تنور بحرك الميت

بقلم الشاعرة … ناديه عبد المحسن