أبويا كانت ضحكته ضحكة نبى …

  كلمات الشاعر

الكاتب … عماد سالم

أبويا كانت ضحكته ضحكة نبى

وكلمته كانت إمام 

الحلم كان يستأذنه

علشان يزوره ف المنام

والدنيا قدام نظرته

تخضع وتدى له اللجام 

ولولاش حرام

 قلوبنا كانت تعبده

أنبل نبى

راكب سفينة رحمة

بتشق الزحام

ولولاش حرام

كانت عيون الخلق

 تدعي له ليلاتى

و فى كل أوقات الصلاة

أبويا كان هو اللى باقى

 من حياتى

هو النسيم الحلو 

لما يدينا الحياه

قالوا لى واحشك ؟

قولت آه

كان التواضع سنته

كان محترم

أصغر صغير فى البلد

مع أنه أكبر م الهرم

وجبينه يشبه القمر

وقت التمام

ولولاش حرام

الدمع نازل من عنينا

كأنه دم

مش أب بس

كان خال وعم

وادين تطبطب ع الجميع

زى الربيع

كان حلم عايش وسطنا

فاتنا ورحل

النسمة زهقت مننا

والحر حل

مالقتش حل يريحك 

غير الرحيل

ياطيف جميل

يا ألف نيل متفرعين

جوه الحوارى والبيوت

ازاى تفوت القلب يصرخ م العطش

والعين تتوه وانت الكبير

مش كنت تفضل وسطنا 

لاجل الأرامل

واليتامى المحرومين

لاجل الغيطان تخضر تانى

والشجر يحفظ أغانى الفلاحين

ويطمنك على كل واحد مننا

كنا عيال ف المدرسة ومروحين

بس الطريق رافض يوصل ع البيوت

والناس بتصرخ مستغربين

من غير ماتستأذن وتاخد رأينا

أزاى تموت ؟! 

أزاى تموت من غير ما تستأذن

وتاخد رأينا ؟!

من أمتى كنا فى السفر

 نقدر نفارق بعضنا ؟!

ازاى نعيط ف الفراق ؟!

دا مافيش دموع من غير عيون 

وانت عيونا كلنا

  كلمات الشاعر

الكاتب عماد سالم