” نورت الدنيـــــا يا أجمــــــل “نـــــوح

بقلم الشاعر …محمدالمصري

ف انتظارك
قبل حتى ماكنت تيجي
كنا ديما ف انتظارك
نفرش الأحلام مخدة
لجل يتبغدد جنابك
والحنين فرعين مودة
يطرحوا بكرة لحسابك
يبقوا ملكك لجل ترضى
بس خلي الود بابك
ف انتظارك
الملائكة زادوا واحد
ربي أحرس نوح وبارك
ف انتظارك
نفسي بكرة لما تكبر
تبقى حاجة زي جِدَّك
ولا أقولك زي خالك
يبقى كل الناس ف بالك
راضي ديما باللي جالك
تبقى عايز اللي منك
يبقى أحسن ياأبني منك
ولا أقولك
تبقى أحسن من ده كله
واللي يسأل
زي مين …. أبقى قوله
زي أمي اللي بشْبه حسنها
ربي زارع فيها رحمه
زي أبويا لما يسأل ع اللي منه
أما تبقى الدنيا زحمه
زي ضلة ….
تحتوينا لما تبقى الدنيا حر وزمهرير
زي جنة ….
اللي عايز يبقى فيها قلبه يتعمر بخير
زي نفْسك ….
لما تتعاشر يقولوا أنت أحسن أنت غير
أنت أول فرحة لينا
بعد حزن سنين ونوح
أنت أصل الحب فينا
تنتهي معاك الجروح
أنت ضحكة من شفايفك
عقلي منها ياناس يروح
أنت قادر وبّْساطة
تشفي قلب وتحيي روح
أنت نعمة ربي لينا
أسمها ف الأصل …….. نـــــوح

بقلم الشاعر محمدالمصري،…..