قضية حجر …

بقلم …صبري حسين

أيوة يا سيدي القاضي
انا جاي طالب الحجر علي ابويا
ابويا يا سيدي القاضي
عنده فلوس كتيرة
لكنه ماسك أيده
بيطلع الجنيه بالعافية
كل ما نطلب منه حاجة
يرد بكلمة واحدة
لا يا ابني دي غالية
ارجوك انصفني سيدي القاضي
بتقول ايه سمعني
انت جاي تطلب الحجر علي ابوك
ابوك اللي افني عمره عليك
ابوك اللي بيتمني تكون احسن منه
معقوله
في التربية
في رايك هي دي الرجولة
إن تطلب الحجر علي ابوك
اتفضل يا حج اتقدم
قرب شوية من المنصة
ايه ردك علي الكلام
سيدي القاضي
انا مقر بكل الكلام
انا فعلا بخيل
ماسك علي الدنيا
مع اني عندي الكثير من المال
انا في حالة ذهول
ده ابني اللي بيقول
عن
سيدي القاضي
اسأله لما انا بخيل
ليه دخلته هو وأخواته
المدارس الدولية
ليه كنت بشتري له الملابس من الماركات العالمية
اسأله يا سيادة القاضي
عن الفسح في افخم الإمكان
عن المصايف وأماكن الترفيه
اسأله يا سيادة القاضي
عن الجامعات الأجنبية
اللي مصاريفها بالعملة الصعبة
اسأله ياسيادة القاضي
هل في يوم حد قصر في حق من حقوقه
انا. ولا. امه
ده كان يأمر يجاب
عمرنا ما رفضنا له طلب
بنعمل كل حاجة لهم بحب
اولادنا هم نبض القلب
مش هتكلم يا سيادة القاضي
عن تعبي وتعب أمه
لما كان أي مرض يلمه
كنا نفضل طول الليل سهرانين جنبه
مش هتكلم يا سيادة القاضي
عن فرحتنا يوم ما خلص تعليمه
اسأله عن الحفلة اللي اتعملت علي شرفه
من تاني يوم كانت وظيفته موجودة
حتي العربية كانت هديه أمه
وظيفته وظيفة محترمة
مرتبها كبير
اكبر من مرتب وزير
فرحنا يا سيادة القاضي
إن ابننا كبر
لكن اللي حصل
خلي قلبي. انفطر
اهمل شغله
ترك وظيفته
اتعرف علي شلة فاسدة
طول الليل سهرانين
مفيش حاجة شغالهم
مصاريف شمال ويمين
سكر. وعربدة
افعال مسخرة
كلمته ونصحته
زجرته. ونهرته
سوقت عليه اخواته والكتير من أصحابه
كلموه. اعماله وخواله
يا ابني ارجع لصوابك
ارجع تاني للطريق المستقيم
انت في طريق الضياع
يا ابني بلاش سهر حتي الصباح
شوف امك وابوك مش مبطلين نواح
يا سيادة القاضي
الشيطان سيطر عليه
مفيش حد قادر. يقنعه
كل يوم يرجع مع الفجر
يفضل نايم لبعد العصر
ليله بقي نهار
ياسيادة القاضي
ابني اللي كان مثال للأمانة
مد أيده علي فلوس اخواته
سرق دهب أمه
مفيش حد قادر يقف قصاده
مد أيده لكل أصحابه
الديون تراكمت عليه
قول لي يا سيادة القاضي
انا اعمل ايه
اضيع حقي وحق اخواته
شقي عمري
مستقبل اولادي
يا سيادة القاضي
اقسم بالله عمري ما كنت بخيل
انا انسان معتدل
بخاف ربي
زي ما علمته وصرفت عليه
اظن لازم. اعمل كدة مع اخواته
يا سيادة القاضي
ابني اللي واقف في المحكمة قصادي
بقي انسان اناني
انسان شهواني
مش بيفكر غير في نفسه
ياريت بيفكر في حاجة تفيده
حاجة. تكبر. منه
لا كل تفكيره في حاجات تضره
عشان السهر ضحي بشغله
ضيع نفسه قبل ما يضيع أمواله
بعترف يا سيادة القاضي
انا بخيل عشان خايف علي اولادي
بخيل لاني عايز. ارجعه لنفسه من تاني
بخيل لاني عايز اخليه انسان محترم
بخيل لاني عايز أحافظ علي مستقبل اولادي
انا بعترف اني بخيل
احكم يا سيادة القاضي
مكنه من كل أموالي
حولني لمستشفي المجانين
ارجوك يا سيادة القاضي
احكم علي بالاعدام
الموت ارحم من هذا الاتهام
سيدي القاضي
خلص مني الكلام
فرح ابني
مكنه من كل أموالي
انا مش ضحية انا الجاني
اني عملت منه انسان اناني
انسان عايش لنفسه
كل اللي يهمه مصلحته
عمره ما اهتم برضا أبوه ولا أمه
انسان ضل عن طريق الهدايه
لازم تكون دي النهاية

بقلم …صبري حسين