بالعقل حسبتها

بقلم دكتور … نبيل بكر

بالعقل حسبتها
لقيت
طولها زي عرضها
متساويين
صدقني قد بعضها

طاب شوف كده
وجرب تعملها
حتلاقيها زي
بعضها

كنا زمان نقول
مره تصيب
ومره تخيب
وسميه شبه
اختها

وعلى رأي
أهل زمان
قراط حظ
ولا فدان شطاره
برضو زي بعضها
كلام
الناس بتقوله
من غلبها

صدقني خليك
على طبيعتك
الدنيا غداره
والخيانه في
دمها

والحظ حظ عوالم
بترقص للى
يبصبص
على هز وسطها
والشطاره كدبه
كبيره
واحد أهبل
أخترعها

طاب ازاي أصدق
والأرزاق بيد
ربك هو بس
اللى يوزعها

بتنزل من السما
رزق يوم بيوم
بس انت حللها
وتوكل على الله
وربك حيفرجها

بلاش تبص للى
في إيد غيرك
وبص للنعمه
اللى انت فيها

صحتك تمام
وبتاكل وتنام
وتدخل الحمام
والصلاه بوقتها

عايز ايه
أكتر من كده تاني
كده تبقى أناني
حافظ عالنعمه
واشكر اللى
بعتها

وبوس إيدك
وشها وضهرها
والدنيا طلقها
ارمي عليها
يمين ودييها
لاهلها

و حب الاخره
وعيش تتمنى
رضاها
واطلب من ربك
بالسلامه توصل لها

صدقني
والله زي بعضها
غني زي فقير
رمانة ميزان
ربك حطها