رَد المظالم …

القصيدة دى لكل ابن عاق وزوجة ابن قاسية
رَد المظالم …
كلمات الشاعرة
مرفت جابر …
…………
لمّا كان عصفور بيحبي
شاله قلبي وقال يارب
كان بيرضع من حناني
نقطه رحمه ونقطه حُب
ساعه ساعه وعام بعام
لمّا عوده ف لبي شب
والنهارده ف حضن تاني
بس حضن ما فيهش قلب
دمع عيني مهما يوصف
برضه يبقى الوصف صعب
كنت أم وكنت أب
هوّ كان عصفور برئ
لمّا كان على صدري يحبي
وامّا شب العود شويّه
طار وشافله طريق لواحده

إنما ضل الطريق
كنت عنده وكل شئ
النهارده بقيت لاشئ
سابها صوتها يزيد عليّا
وهوّ كان بيزيد قسيّه
ياما قولت دي زي بنتي
بس لعبت ياما بيّا
إبن بطني بعد ضعفي
جابلي تحت جناحه حيّه
وامّا كان يلاقيني قاعده
جنب ركن ومتداريه
حتّى ما يحنش عليّا !
يااااااه يا دنيا
ياه ياقلبي
يااااه ياعمري
ألف حسره ف قلبي تهري

من شعور الأم لمّا
تبقى قاعده يادوب كماله
أو تحس وجودها عاله
واللا بلوى
أو مصيبه
رغم عمري ما كنت ليها
م الحماوات الكئيبه
كنت اقول بنتي الحبيبه
منزلتها زي إبني
وامّا عجز العمر صابني
بانت الصوره المخالفه
وصّلني أعيش وخايفه
تنهي أيامي بإيديها
مش رح ادعي ف يوم عليها
لجل إبني ما ينكسرش
إنما مش لاقيه وش

يدعي ليها بأي خير
بس رب الكون كبير
هوّ باللي قاسيته عالم
هوّ بس لواحده عنده
بالأكيد رَد المظالم
والأكيد ح تدوق مراري
لمّا عصفورها الصغيّر
ريشُه يكبر
أو يطير لبعيد ويرجع
وتلاقيه جايب عشانها
تحت ضل جناحه ..
حيّه

كلمات الشاعرة
مرفت جابر