شعر … كريم أبو القاسم الوحيشي

ليبيا. 

تحلويس خاطر فى عقاب عشية..

شبيه نوم بعد العصر حايس بيا..

تحلويس شق الخاطر.. من حال متراكم نقض يساطر..

سطير جرح ماداوه طب وشاطر.. ولا منو جاء مدزوز لي القضية..

قضية خصومة وشرك جاب القاطر.. من كربته والاطراف هملت زيا.. ترخوا اطنابا اماثقا اتناطر..

انقطعوا الرساوي في ليلة العمية.. كرينتي ظلم ظلامه ماطر..

مطر مش مطر قزقاز موش اميا.. فهيم يفهما قولي خبير مخاطر..

يحس بي تحلويسى وبي مافيا.. تحلويس بيا حايس..

تكدرت مانعرفش كيف نسايس.. خطرت جروح الوطن داهم غايس..

مكن في اعظامه بعد فات الرية.. عليك حال قايستا ومايتقايس.. فيه سر خلا ناسنا مبلية..

لا حكم لامحكوم لا من رايس.. اكلها سواء ف ساعة تكون رعية..

يافرحة الطامع بضحكه كايس.. مادام وطن العز راح تفيا.. فيك الرجاء يا الله ها الغسايس..

تبري وجعها يعود يبهر ضيا..

شعر… كريم ابوالقاسم الوحيشى الزنتان .ليبيا.2023/4/22