كلمات الشاعرة … الأم لولو
فارش حكاوي الشوق
على أرض أيامي
والذكريات عندي
والماضي قدامي
موجود كمان أفراح
في الوهم عشناها
أحاسيس تعرّي الوجع
فاكسيه بأحلامي
وبابيع ليالي زمان
مين يا هوى شاري
ريشة جناح لملاك
زارني في أوهامي
ودفاتر الكلمات
مغزولة من دمي
معقودة بغرامي
في حد قال يشتري؟!
دا السعر مش غالي
ينبوع دموع ببلاش
وليالي يا ليالي
أصليّة باختامي
خطفوا الأمل مني
ورموني جنب رصيف
قلبي وقف يبكي
بردان في عز الصيف
مرت سحابة عليه
طبطب على دموعها
لمعت نجوم الشوق
فاتدارى في ضلوعها
كل الزهور في الخريف
بتنادي لربيعها
وأنا جيت أبوس وردتي
ساوموني على بيعها
ماملكش غير حلمي
وليالي من غير ضي
دفتر عليه ألمي
وكفن لميت حي
كلمات الشاعرة
الأم لولو
Discussion about this post