إنتهينا … ؟

كلمات الشاعر الإعلامى … عاطف عبدالحميد
……..
انتهينا ؟ و لا دى بس البدايه؟
و الزمان بيلِّم أوراق الحكـايه
دمعتين على كام بحبك واشتغاله
عُمر مش عايشاه رميتهُ خلاص ورايا
حلم تايِّه.. عامله نفسى مصدّقاه
كنت بحلم ابقى ف الاحلام معاه
بس قبل الضىّ من اوهامى تاه
مش باقى لهُ إلا صوره ف المرايه!!
….
ابكى يعنى ؟ولا اعمل روحى جامده ؟
لما إيدى تمسح العمر القديم؟
لما كنت ف قلبَه عامله نفسي واحده
و ابقى دايبه من غُنا عبد الحليم؟
لو يقول أهواك.. يدوب الرمش منى
قدى انا المياس ..و انا سواح يغنى
بس قال تخونوووه وغاب الحلم عنىِّ
بعدها مشانى على الشوك الأليم!!
…….
لمِّى باقى العمر يا ايام ونامى
وامنعى رمشى من الاحلام خلاص
القلوب هِياَّها و الأوجاع اسامى!
و الألم قسمه وجوا الحزن ناس !!
مش مهم الدمع .. عيني اقوى منه
حتى لو ف الحزن..قلبى نيابه عنه
لوماهوش موجوع وبُعدى لحظه جَنُّه
يبقى صفحه م الكتاب عدت خلاص!!
……
كلمان الشاعر
الاعلامى عاطف عبدالحميد