الله … يا اللــــــه

كلمات الشاعر … محمد جمعة

لقيت في الدموع مخالب تخربش
و تحت المخالب مواجع بتفرش

ب اعيش فض سيرة تطبطب في حيرة
و مسلك واخدني لمهرب يدروش

فدبلت و نشفت رموش جفن عيني
و تاهت ملامحي في ناس بتواسيني

مرار المرار معشعش في ذاتي
و لازم و حتما يعلقم يوماتي

ليل بيجاريني مواصل نهاري
و صبح يحاكيني بجرعة مراري

يزمزأ لو ارفض … يزرجن و يشرط
يضاعف نصيبي بكاس إضطراري

فلازم شفايفي تدوق المرارة
و دمعي المزاور خدودي بحرارة

بيغرز مخالبه في خدي اللي شاربه
فيقتل خلايا و يطفي النضارة

بقيت زي مدمن مجافي إبتهاجه
و عايش يدندن في حزنه بمزاجه

في قلبه ابتسامتة القديمة إتنساها
و كرمش وسامته … طواها و رماها

و ساب المخالب بتنهش و تنهش
تجعد .. تعقد تكلكع … تكلبش

كإن الحياة ممات مش حياة
و كل اللي فيها هلاك مش نجاة

و ٱية … تمر في ركعة صلاة
ترجع ثبات الإيمان اللي تاه

قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ …..
لَا تَقْنَطُوا مِن رَّحْمَةِ اللَّهِ

صدق الله العظيم