لتلك القلوب أكتُب * أهل الشقا

بقلم … مامت كارينا

يااااااه ع الوشوش
إللى عايشه ع الشقا
يا إيدين نضيفه
برغم إنها متجرحه ومتشققه
ياقلوب شايله همّ السنين
وعيون حزينه بتدارى خوفها وترسم حياة
على لوحه خشب متفككه
ترسم ملامح بكرة اللى مش باينله ضى
تمشي توزع ورد الأمل
ع اللى رايح وع إللى جى
تزلزل سكون الليل
بصوت ضميرها الصاحى
ولسان بينطق بدعوة حلوة
فى السما متعلقه
ياوشوش بريئه ياواخده دايما ع الشقا

لا عمرها حلمت بقصر
ولا كان في يوم حلمها
لا حلمها فى رصيد فلوس
ولا عمرها
دقت بيبان العز
راضيه بنصيبها واللى كاتبه ربها
بأربع حيطان ولقمه حاف
وجمبها شوية عسل
تحلى مرار الزمن
وكأنها أكبر أمانى متحققه
ياقلوب بسيطه يا قاضيه عمرك ف الشقا

يانفوس عنيده بتكسرى أنف السنين
بالقناعه والرضا
وبتزرعى على الجبين
ورد الحياه وبتسمعى صوت الأنين
ويا الأذان
وبتسقى وردك من ماء وضوئك
ويابخت من لبى النِدا
وجمع حسابه ليوم عسير
الخلق فيه متفرقه
ياوشوش بريئه وواخده دايما ع الشقا 💔