لحمة حمرا …!!!

كلمات الشاعر …حمدى موسي

خليكى فاكرة انتى اللي جيتى لحد بابي وزقيتيه
خليكي فاكرة انتى اقتحمتى خلوتى وأخدتى
قلبي وفكيتيه
ودخلتى أحرف كلمتى ونخلتى شعرى ونقيتيه
خليكى فاكرة انا قلت لك خليلي قلبي باللي فيه
ده أولا…..
أما باحبك واختها وكل اللي مالت بختها
وقصيدة قالت خنتها وكتبتها على أى حال
والهجرة خارج وحدتى والسعى على إحساس حلال…
والغربة والليل والضنا … والحزن وبخار الغنا
دى حاجة خلقة ربنا…
والشوق اذا هوب هنا ..دا حاجة غصب عننا
مفروض علينا نشتريه
فاكهة مفيش فيها نوى
دايما بتطرح من هوى
قلبي علي الشعر استوى. كلمة باحبك للقصيدة
كأنها الوادى طوى …ولو استقر المعنى هيبان اللى فيه
خليكى فاكرة انا قولت لك…قلبي عنيد
عمره ماشاف للدنيا عيد
وعشان كده ..فتحوه يشوفوا الحزن فين
مالقوش جديد…. لقوا كل حاجة بتوجعه
واللي يحسه يرجعه….ومفيش ف روحه أى حاجة تشجعه…واقرب اليه الشعر من حبل الوريد
فانتى كده بتغيريه
خليكى فاكرة انى فقدت الذاكرة
وجميع بيانات الهوى مبقتش تبع القاهرة
غيرت عنوان الشعور
ورجعت تاني الفلاحين
ومشاعرى رجعت للطحين للأرض ولبذر المنى
ورجعت تانى للسذاجة المؤمنة
إنه اعتراف الحب عيب
أنا قلت لك عقلك فى راسك إسأليه
بصي عشان مبقيتش حمل المعشقة
قلبي وراه موضوع كبير
فيه سر والله خطير
لو قلت لك هيكون فى بير ؟
أنا قلبي ده أصلا غريب
كان لحمة حمرا لقيته بين قسمة ونصيب
مرمى علي باب الهوى
خفت الليالي تدوس عليه
ارجوكى حاولى تبعدى…وان كنتى ناويه تعندى
بالراحة لاحسن تقتليه