المخفي التوكتوك

كلمات معوض حلمي
شاعر عامية

عم ازدحمد دقه قديمه
لكن فكره بجد عاجبني
مره لقيته ملازم بيته
روحت أزوره ولما سألته
قالي المخفي التوكتوك صابني
وروحت .. بلاش

عم ازدحمد كان معدول
طيب جـدا وابن أصول
كان بيصلي الفرض بفرضه
حتى السنه .. ماضيعهاش

عم ازدحمد شوفته امبارح
ماشي مبلم وشه مضلم
طالع سارح .. وماصلاش

كان مشغول البال وحزين
ماشي يكلم نفـسه وتايه
لاجل يبيع ويسد الدين
زرع الزرعـــه .. ومـاكلهاش

عم ازدحمد عمره ماضاع
ولا كان نافر م الأوضاع
عمره ماساب الأرض وسافر
حتى كباري البندر يابا ماركبهاش

طالع نازل .. جاي ورايح
قولتله مالك عقلك طاش
قالي الحسبه ياواد مغلوطه
ومظبطاش

الأسعار بتزيد بالتوره
والتجار بكروش مسعوره
والفواتير .. مابترحمناش

عم ازدحمد
قاعد يضرب كف بكف
قالي اسمعني ياسيدنا ل افندي
عمري ماشوفت الحاله الطين دي
حتى خيالي .. ماصورهاش

الإنسان إزاي هايعيش
ويحس بذاته
لو ماحلمش
لو ماشبعش
لو مافهمش
لو ماسألش
ليه الحلم مفارق روحه
ولسه .. ماجاش

كنا زمان ع الفرن البلدي
قبل الغاز
نخبز عيشنا وناكل منه
لقمه هنيه وكنا عزاز
وجينا يافندي زمان الغمه
ضيعنا وضاع الدفا واللمه
وبحرنا عايم بالألغاز
نغطس نغطس .. وماعومناش

عم ازدحمد بيسأل بس
عايز يفهم
عايز يعـــرف رايح فين ..؟
ليه مانعين البنى ف بلدنا
وبيبنوا بلاد ف التلفزيون
وليه الرقاصة بتبني قصور
وليه فلاحنا بياكل طين ..؟

وليه المخفي التوكتوك صابني
وروحت .. بلاش
ـــــــــــــــــــــــــــــــــــــــــــ