لفحة الأحباب ..

كلمات الشاعرة … نادية البسيونى
——————
مادام الليل بقى كابس على عيونهم
ومش شايف قمر عينك قريب منهم
فخليهم على حالهم
يا طير مالك بقى ومالهم
بتحلم ليه على رمالهم
وتبني من جفا قلوبهم قصور وجبال
وهبة ريح
تهد من الهوى أميال
بلاش تتغطى بالأوهام
وتصنع من وتر هلكان
حنين للناى
وتر عارف
بإن العمر كان نساى
وعارف لفحة الأحزان
خبرها كان
بلاش تحلم وتتمسك بموج فاهم
حقيقة الموت على مرساه
فيتخبَّط فى أوجاعه
ويرجع تاني مع ذكراه
ويتلخبط مع الأمواج
يا طير مالك بقى ومالهم
بلاش تمسك فى أحبالهم
وتتمرجح فى خيط دبلان
وتغزل من لهيب الشوق
بلوفر قد حجم الكون
تتوه جواه
كما الفاقد عيون عقله
على ليلاه